حوار الأجيال ..بعيدا عن الكورفـانورد

حوار الأجيال ..بعيدا عن الكورفـانورد

فى التاسع عشر من مارس عام 2009 كنت جالسا فى مدرجات الدرجه الثالثه بستاد القاهره بين ثلاثه من مشجعى النادى الأهلى الذائبين فى ثراه المشكلين على نيران مراجله ننتظر بدأ مباراة الأهلى والاتحاد السكندري فشعرت للحظه برغبه فى السكوت والاصغاء لحديثهم فى حب النادى الأهلى باختلاف الطرق والأذواق حيث ان أكبرهم ينتمى لمشجعى أوائل السبعينيات كما أخبرنى ويدعى عم مرسى وهو عامل باحدى الشركات والثانى يدعى خالد واحد من مشجعى مطلع هذا القرن ويعمل مهندس أما الأخير أحد أعضاء رابطة ألتراس اهلاوى الكائنين بـ((ـالكورفانورد)) ولم يفصح عن اسمه لأسباب أمنيه لكنه اكتفى بذكر الـ((ـنيك نيم)) وهو"بوبوس" طالب بالجامعه الأمريكيه وعلمت أثناء حديثي معه انه لم يكن جالسا بالـ((ـكورفانورد)) أيضا لأسباب أمنيه.
بداية بدا الحديث هادئا بعض الشئ ولم يتعد مساحة التعارف بين الثالوث الأهلاوى وأنا بينهم كأى جماد.
وحينما بدأ الحديث فى الاشتعال بدأت أدون مقتطفات منه فى أجندتى واليكم أجزاء الحديث التى دونتها.
قال خالد لبوبوس:انت ليه اشتركت فى الالتراس؟
رد بوبوس:أنا اتولدت لقيت أبويا أهلاوى فبقيت زيه وبحب الأهلى جدا وبعد كده لقيت أصحابى أعضاء فى التراس أهلاوى فبقيت زيهم.
خالد:طيب ايه اللى عاجبك فى الالتراس؟
بوبوس:كل حاجه سهراتهم وقعداتهم والروشنه بتاعتهم وكمان اللى بنعمله فى الماتشات متعه متعه.
الحاج مرسى:يعنى ايه متعتك فى التكسير والحرق والكلام الفاضى ده؟
بوبوس:احنا بندافع عن نفسنا.
خالد:وايه الدفاع عن نفسكم فى تخريب أملاك الشعب بسبب تهوركم اوانكم تحرقوا مشجع من مشجعى الزمالك ومشجعي الزمالك يكسروا صالة الباسكت بوول بتاعتكم؟
الحاج مرسى:عيال طايشه ناقصهم العقل والمسئوليه طيب مين هيدفع الفلوس دى يا بوبوس انا بنصحك بخبرة السنين عشان انت زى ابنى؟
بوبوس:احنا لا طايشين ولا عيال احنا فاهمين اكثر منكم وبعدين جماهير الزمالك شتمونا وشتموا الأهلى ولازم نرد للاهلى هيبته وكمان جماهير الاسماعيلى غلطوا فيناوبعدين ما البلد تدفع الفلوس هى الضرايب اللى بياخدوها شويه ولا أملاكنا اللى بيبيعوها وينهبوا تمنها شويه.
وببساطة عم مرسى الراجل الغلبان مفهمش فميل على أذن أحد المشجعين الجالسين بجانبه وسأله:هو الحكومه بتبيع بيوتنا؟
وكان رده:لا يا حاج قصده الخصخصه بيبيعوا شركات ومؤسسات الحكومه لرجال الأعمال وطبعا دى ملك الشعب والحكومه بتديرها.
خالد:بس اللى انت متفهموش ان الأهلى كبير وأكبر من واحد او اثنين أو الف شتموه.
سكت بوبوس وظهرت على وجهه الحيره
ثم قال:هو انتم سيبتوا الكويس ومسكتوا فى كم حاجه تتعد ع الصوابع.
خالد: لا انت غلطان الالتراس بيساعدوا الاهلى دائما فى الفوز لكن باللى بيعملوه المساوئ طغت على المحاسن وأصبحوا بيمثلوا خطر على أمان مصر والدليل ان الامن واقفلهم جامد وادارة الاهلى نفسها ضدكم لسه انبارح بس موصيه عليكم الشاعر.
بوبوس:خلاص يا جماعه الأهلى ادارته اتخرست مش سامعينلهم صوت ولا عارفين يفردوا دراعاتهم غير عليناوبعدين مشفتوش الأمن عمل ايه فينا فى ماتش يانج افريكانز
مرسى:طيب ليه عايزين تدخلوا المدرجات بالعصيان فى الأعلام؟
بوبوس:عشان الامن غدار
مرسى:عشان الأمن غدار ولا عشان تسرقوا علم يانج افريكانز زى علم الصفاقسى؟
بوبوس:لو عرفنا كنا هناخده اصل ده شو جامد طحن يا عمو.
خالد:وبعدين ما الأمن غدار بسبب عمايلكم السودا.
بوبوس:لا لا لا بسبب ان مالناش ضهر حتى ادارة الاهلى ضدنا عشان متعملش مشاكل وكمان الاعلام ضدنا.
مرسى:انت بتقاوح ليه هسألك سؤال لو قعدوك جنب مشجع اسماعيلاوى هتحس بايه؟
بوبوس:مش عارف بس حاسس انى ممكن احرقه.
خالد:وفين الروح الرياضيه وأخلاق الأهلى اللى انتم بتحبوه كده؟
عم مرسى:يعنى انت يابنى بتروح عشان تاخد بتارك مش عشان تشجع ناديك.
بوبوس:لا لا بروح عشان أشجع الأهلى بس مانا بعمل زى مابيقولولنا.
عم مرسى:مين اللى يقولولكم؟
بوبوس:اللى بيقودونا فى التشجيع.
عم مرسى:ودول ايه مصلحتهم.
بوبوس:أكيد عشان بيحبوا الأهلى.
خالد:أشك! الأهلى جزء من مصر واللى يساعد على خراب مصر يبقى بيخرب فى الأهلى.
عم مرسى:طيب متعرفش مين بيحركهم؟
بوبوس:مش عارف انا مبقتش فاهم حاجه.
خالد:يا عم مرسى ما تقارنلنا بين التشجيع زمان والتشجيع دلوقتى.
عم مرسى:التشجيع يا ولاد اتغير كتير زمان كنا بنروح عشان نشجع عشان نستمتع من غير أذى عشان كنا بنحب بعض وبنخاف على بعض مفيش بيننا أهلاوى وزملكاوى والكلام الفاضى ده غير فى الهزار ده احنى حتى مكنش فى ماتشات الاهلى والزمالك بيكون بيننا حواجز وكنا كلنا بنحب مصر أكتر من أى حد ،دلوقتى بيحبوا الأهلى والزمالك وبيتعصبولهم أكتر من أى حد،زمان كان مستحيل تخرج مننا عيبه دلوقتى بقى ده العادى كل ماتش مايفتش من غير العيبه
المشكله دلوقتى ان محدش بيحب حد.
بوبوس:يعنى يا عم مرسى انت عايزنا نشجع من غير الشماريخ اللى بتخلى شكل الاستاد يفرح ولا الأعلام الحمرا اللى بتدل على وحدتنا وحبنا للأهلى.
مرسى:"لا ضرر ولا ضرار" شجع براحتك بس الشماريخ ممكن تضرك وتضر غيرك وبالنسبه للاعلام خد أعلامك معاك بس مش لازم يبقى فيها عصايه.
وكمل بوبوس كلامه:بس احنا زى أى حاجه لينا مميزاتنا ولينا عيوبنا.
خالد:نرجع ونقول غاصت المحاسن فى بحر المساوئ.
بوبوس:طيب انتم شايفين ايه المميزات؟
عم مرسى:ميزة الألتراس انهم بيشجعوا فى كل حال ومنظمين وعندهم اداره كويسه ودقيقين فى كل حاجه
وفى وقت التشجيع شكلهم حلو اوى زى الناس بتوع اوروبا.
خالد:ياريت تحاولوا تتلاشوا الأخطاء وتغطوها بالمحاسن حتى يحلق التشجيع فى مصر فى سماء التشجيع العربى.
لأنكم بالطريقه دى بتضروا مصر.
بوبوس:بس برضه لازم يخلوا الاعلام يبطل اللى بيقوله علينا ويبطل الهجوم اللى مبيخلصش عشان احنا كمان نمحى المساوئ لأن الاعلام بيشحنا جامد ضده ولازم يبطل تعصب عشان احنا بنتأثر بتعصبه ويكون اعلام محترف.
واستمر النقاش قليلا الى أن بدأت المباراه وشرعوا جميعا فى التشجيع حتى أحرز الأهلى هدفه الأول وقابل الثلاثه بعضهم بالأحضان مبرزين الطبيعة المصريه الأصيله.
وبعد لحظات سمعت مناديا لم يكن صوته غريبا على أذنى يقول
((يلا اصحى مش قلت عايز تقوم تتفرج على ماتش الاهلى والاتحاد))